Best of Geiranger Kayak

Har du lyst til å oppleve Geirangerfjorden på to ulike vis – både til lands og til fjords? Her kan du kombinere ein times GPS-guida rundtur i fjordlandskapet i den vesle, grøne elbilen med ei fredeleg ferd på vatnet i dobbel kajakk. Når du hentar bilen, vel du sjølv om du vil køyre turen mot 1. Ørnevegen eller 2. Flydalsjuvet.

Ørnevegen: Først køyrer du gjennom Geiranger sentrum, langs fjorden og opp Ørnevegen, som slyngjer seg oppover mot den vidgjetne Ørnesvingen. Der du får eit fabelaktig utsyn over fjorden, mot dei storslåtte fossefalla Dei sju systrer og smålåtne fjellgardar. Ruslar du nokre få minutt vidare frå Ørnesvingen, finn du Unesco-plaketten og ein sti som fører til eit anna vakkert utsiktspunkt, litt unna trafikken. Kanskje kan det vere godt å sitje litt her, for verkeleg å «kjenne» på utsikta og den evige fjorden.

Flydalsjuvet: Denne panoramaturen har fleire stoppepunkt. Først køyrer du oppover mot fjellet i aust til Flydalsjuvet, der du kan sitje på ei trone og nyte utsikta mot fjorden og svimlande djup. Vidare går ferda oppover dei grøne bakkane mot fjellgarden Vesterås, der du får ei praktfull utsikt over fjord og fjell.

Med kajakk kan du utforske Geirangerfjorden på eiga hand, gli forbi steile klipper og nyte utsikta mot dei storslåtte fossane Dei sju systrer og smålåtne fjellgardar. Her kjem du verkeleg tett på elementa! Kajakkane er stabile, enkle å padle og snu, slik at du kan slappe av og nyte naturen. Det er ikkje nødvendig å ha padleerfaring, men energi, entusiasme og godt humør vil vere nyttig!

Når du skal leige kajakk, finn du kajakkutleiga på Homlung. Du kan gå ein halvtime eller få låne ein sykkel av oss for å kome deg dit frå Geiranger sentrum. Gi beskjed i tekstfeltet om du ønskjer å låne sykkel.